Autonomo eta profesionalentzako estatuko dirulaguntzak Nafarroako errealitatera egokitzea eskatu du Geroa Baik

Autonomoentzako eta profesionalentzako estatuko funtseko 67,7 milioi euroko laguntzen deialdia Nafarroako errealitatera egokitzea ahalbidetzea eskatu du Geroa Baik, hasiera batean aurreikusitako 12.500 eskabideetatik, pasa den abuztuaren 20an Garapen Ekonomiko eta Enpresarialeko Departamentuan 1.735 bakarrik aurkeztu zirela jakin ondoren. 

Mikel Asiain koalizioko parlamentariak ekimen bat erregistratu du Foru Ganberan, horren bitartez “Estatuko Gobernua premiatuz Foru Gobernuak  autonomo eta profesionalentzako dirulaguntzen deialdiaren baldintzak eta oinarriak aldatzea ahalbidetu dezan, gure Komunitatearen errealitateari egokituz, Covid-19aren pandemiak eragindako krisialdiak gogor zigortutako sektoreetan ahalik eta onuradun gehienetara iristeko helburua lortzeko”. 

Asiainek ziurtatu duenez, “aurkeztutako eskabide kopuruaren urritasunak agerian uzten du Madriletik ezarritako baldintzak eta oinarriak ez direla sektorearen errealitateari egokitzen, horrek bere tramitatzea galaraziz”. “Funtsaren zati handi bat banatu gabe geratzea eragingo du honek eta hortaz, hasiera batean diseinatutako helburuak ez betetzea ere”, azpimarratu du. 

Geroa Baiko parlamentariak gogorarazi duenez, “kaltetutako sektore ekonomiko ezberdinetako gremio antolakunde ezberdinek jada salatu dute inposaturiko baldintzek funts hauen zati handi bat exekutatu gabe geratzea eragingo dutela, bai eta hornitzaile guztiekin zorrak egunean dituzten profesionalak dirulaguntzetatik kanpo utz ditzaketela ere”. 

“Esperientziak frogatzen du Nafarroako Gobernutik arestian egindako dirulaguntza deialdietan diru banaketaren arrakasta askoz handiagoa izan dela. Koronabirusaren pandemiak gogor zigortu dituen sektore hauen beharren eta baldintzatutako dirulaguntza hauek eskuratzeko aukeraren artean diskordantzia handia dagoela agerikoa izanik, Gobernu zentralak deialdia aldatzeko aukera eskaini dezan eskatzen dugu, gure komunitateko errealitateari egokitzeko helburuarekin”, amaitu du adieraziz Geroa Baiko parlamentariak.