Barkos Ukrainako gerraren eragina leuntzeko neurriei buruz: “koordinazioa bai, baina azkartasuna ere, bestela eraginkortasun osoa galduko da”

Uxue Barkos Geroa Baiko bozeramaileak Nafarroako Parlamentuko Mahai eta Eledunen Batzarraren ondoren egindako adierazpenetan, ostiral honetan koalizioaren ekimenez egingo den soldata arrakalari buruzko osoko bilkura monografikoari erreparatu dio. “Ekintza politikoaren eta Nafarroako Parlamentuaren jardunaren zati garrantzitsu izan behar den gai baten aurrean gaude”, defendatu du.

Bestalde, astelehen honetan Nafarroako Parlamentuko Eledunen Batzarrera Navarra Sumak aurkeztu duen adierazpen instituzionala aipatu du ere Barkosek, adierazpen horrek Korrikaren “erabilera sektarioa” gaitzetsiz, “ETAko terroristen aldarrikapenerako eta ezker abertzalearen aldarrien plataforma” bihurtu zela adieraziz. Barkosek “Korrikaren edozein erabilerari, edozein patrimonializazio saiakerari, erabilera interesaturi gaitzespen tinko, erabakia eta irmoa” adierazi dio, “Euskararen aldeko festa baino ez baitu izan behar”. Horrela, “Korrikaren baitan beste aldarrikapenak egiteko egon den saiakera” kritikatu du, baina era berean, “adierazpen instituzional honekin dena zati batekin nahasten saiatzea” gaitzetsi du ere. “Korrika ikusi ahal izan genuenaren zati bat dela sinestarazten saiatzea eta parte hartzaile guztien jarrera maioritarioa ez duela ordezkatzen esatea, pankartekin egiten saiatu direna bezain gaitzesgarria da”, gaineratu du.

Halaber, Trafiko eskumenaren atzerapena aipatu du ere Barkosek eta azpimarratu duenez, Nafarroako Gobernuaren eta Gobernu zentralaren arteko 3 urteko lanaren ondoren, ez litzateke ulertuko jada sinatua dagoen eskumen hau gabe amaitzea legegintzaldia.

Ukrainako gerraren eragina leuntzeko hartutako neurriei dagokienez, Barkosek Nafarroako exekutiboaren eta zentralaren arteko neurrien koordinazioaren alde egin du, baina beharrezkoa den azkartasuna azpimarratu du ere. “Koordinazioa bai, baina azkartasuna ere, bestela eraginkortasun osoa galduko da”, esan du, aldi berean ziurtatuz erabakien hartzea “azkarra bezain eraginkorra” izan behar duela. Gainera, datorren kontrol saioan Geroa Baik erregai litro bakoitzeko 20 zentimoren merkatzeak Nafarroako diru-kutxetan izango duen eraginari buruz galdetuko duela iragarri du.