Iruñeko Geroa Baik Sanferminen balantze positiboa egin du eta herritarrak nabarmendu ditu gizarte eragile gisa

Iruñeko Geroa Baik jaien balantze positiboa egin du eta herritarrek eta eragile sozialek Sanferminen eragile gisa duten garrantzia nabarmendu du. Hala ere, koalizioak kritikatu du Navarra Sumak ez duela elkarrizketarik izan kolektiboekin hiriko lagapen-guneen kudeaketan adostasunak lortzeko. Koalizioak “jaietarako espazioak bere nortasunarekin sustatzeko beharra” nabarmendu du, eta deitoratu egin du “Mayak gizarte-eragileak zentsuratu izana, hala nola kultura-aniztasuneko kolektiboak, peñak edo Herri Sanferminak, dibertsitatea zein aberasgarria den kontuan hartu gabe”.

Koalizioak adierazi duenez, garbiketa zerbitzuek zabor gehiago bildu dute San Fermin 2022an 2019an baino, eta ildo horretan, Enrique Maya alkateari egindako kritikan berretsi du “Gazteluko Plazan 10 barra jartzea erabaki zuela, alde bakarretik”. Udal taldearen iritziz, “erabaki txarra izan da, eta hiriko egongela zaborrez betetzea ekarri du”.

Curia kaleko istiluei dagokienez, Iruñeko Geroa Baik gaitzetsi egiten ditu “San Fermin eguneko prozesioan gertatu ziren erasoak”, eta azpimarratzen du “zilegi dela kritika politiko oro, baina beti modu baketsu eta errespetuzkoan egin behar dela”.

Bestalde, Iruñeko Geroa Baik zorionak eman dizkie herritarrei, aurten ere, “Sanferminetan izandako sexu-indarkeria oro gaitzesteko batasuna erakutsi dutelako”. Udal taldeak berretsi egin du “konpromisoa duela Nafarroako erakunde publikoekin, mugimendu feministarekin eta herritar guztiekin batera lan egiteko, emakumeen aurkako sexu-indarkeria eta emakumeen eta gizonen arteko desberdintasun sozial guztiak desagerrarazteko".

Azkenik, Iruñeko Geroa Baik eskerrak eman dizkie “jaiak posible egin dituztenei, hala nola osasun, garbiketa eta garraioko langileei”.