Nafarroako Parlamentuak NU eta NUP -ekin 2021erako duen lankidetza-hitzarmena berritu du

Nafarroako Parlamentuko lehendakari Unai Hualdek eta Nafarroako Unibertsitate Publikoko errektore Ramón Gonzalok gaur sinatu dute bi erakunde horiek 2021ean hainbat zabalkunde-jarduera egite aldera adostu duten hitzarmena.

Hitzarmena txertatuta dago Parlamentuak eta NUPek nork bere helburuak lortzeko moduko ekintzen abiarazpena bideratzearren 2001eko ekainaren 11n sinatu zuten lankidetzarako esparru-akordioan.

Itun horretan jasotako lankidetza-modalitateen artean daude, besteak beste, "izaera juridiko, sozial edo politikoko azterlanak, proiektuak edo programak egitea" eta "ikastaroak, hitzaldiak eta jardunaldiak antolatzea".

Zehaztutakoaren arabera, gaurkotasunak erakusten du “egokia dela gizartearen inguruko azterlanak egitea, ordezkari publikoak herritarrekin konektatzeko eta egoeraren araberako azterketa bat izateko, politika publikoen definizioa eta hobekuntza haren eskaeretara egokitzeko".

Horregatik, hitzarmenak Zuzenbidekoak eta Zuzenbideko eta Enpresen Administrazio eta Zuzendaritzako Gradu Bikoitzekoak diren unibertsitarioen eta parlamentarien arteko topaketak jasotzen ditu, eta azken urteetako formatuari eustearen aldeko apustua egin da: hots, zuzeneko solaskidetza, xedetzat duena forudunei eta haien lanari buruzko ikuspegi osoagoa erraztea.

Eztabaidarako Ikasgela ere jasotzen da hitzarmenean (22.650 euroko zenbatekoarekin); izan ere, kultura politikoari buruzko hausnarketarako gune bat izanen da, eta toki-mailako hainbat lehiaketa bilduko ditu (Unibertsitate Eztabaidako XX. Liga, Euskarazko VIII. Eztabaida Txapelketa). Era berean, estatu-mailako lehiaketetan parte hartzea aurreikusten du (Unibertsitateen G9 Taldearen Unibertsitate Eztabaidako XII. Liga, G9 Taldearen VI. Hitzaldi Txapelketa), Eztabaida Klubari jarraipena ematen dio (hastapen-maila eta maila aurreratua), eta finkatu egiten du modalitate horrek unibertsitateaurreko eremura izandako hedapena (Batxilergoko Eztabaidaren XII. Txapelketa), aurten euskarazko hiru talde izateko aurreikuspenarekin.

Aholkularitzaren arloan, NUP konprometitzen da Nafarroako Parlamentuko liburutegiari bidaltzera Zuzenbidearekin, Gizarte Zientziekin eta Nafarroari berariaz lotutako beste gai batzuekin lotuta egiten dituen argitalpenak.

Eremu horretan, NUPek bere irakasle eta ikertzaileak jarriko ditu Nafarroako Parlamentuaren esku, saio monografikoen bidez konplexutasun bereziko gaietan aholkularitza eman dezaten.

Bestalde, eta hitzarmen espezifiko baten xede bada ere (26.349,35 euro), eutsi egiten zaio Iritzi Publikoaren eta Gizarte Berrikuntzaren Parlamentuko Katedrari, zeina arduratuko baita, jadanik ohikoa denez, Iritzi Publikoaren Barometroa (Navarrometroa) lantzeaz, gizarte interesa duten gaien inguruko ikerketak egiteaz eta hauek zabaltzeaz, eta Gradu Amaierako Lan edo Graduondoko Amaierako Lan hoberenarentzat sari bat antolatzeaz.

Hitzarmena sinatu ondoren –48.999,35 euroko gehieneko aurrekontua du– , Unai Hualdek eta Ramon Gonzalok "poza" adierazi dute, "urte askoan" iraun dezala espero duten "harreman onuragarriari jarraipena" ematen diolakoan. Era berean, “Nafarroako Parlamentua gazteriari hurbiltzeak” duen garrantzia nabarmendu nahi izan dute.

Nafarroako Parlamentuak eta Nafarroako Unibertsitateak 2021 urterako lankidetza hitzarmena sinatu dute

Nafarroako Parlamentuko lehendakari Unai Hualdek eta Nafarroako Unibertsitateko errektore Alfonso Sánchez-Tabernerok gaur sinatu dute bi erakundeek 2021ean hainbat jarduera batera egiteko hitzarmena.

Nafarroako Parlamentuak eta Nafarroako Unibertsitateak 2001eko maiatzaren 15ean sinatu zuten lankidetzarako akordioaren baitan sartzen da hitzarmena, bi erakundeen helburuak lortzen lagun dezaketen ekintzak abian jartzea ahalbidetzeko.

Itun horretan jasotako lankidetza-modalitateen artean daude, besteak beste, “izaera juridiko, sozial edo politikoko azterlan, proiektu edo programak egitea” eta “ikastaro, hitzaldi eta jardunaldiak antolatzea”.

2021eko Hitzarmenak jarraipena ematen die Komunikazio Fakultatearen berezko jarduerei, baita Zuzenbide Parlamentarioko Ikasgelari dagozkion jarduerei ere, besteak beste, maila akademiko altuko jardunaldi bat, hitzaldiak, ikasleen bisitak eta unibertsitateko ikasleen eta Parlamentarien arteko topaketak.

Zuzenbide Parlamentarioko Ikasgela parlamentua eta honen eginkizuna ikasleen artean zabaltzea ahalbidetzen duen programa da, eta honen barnean “maila akademiko altuko” jardunaldi bat antolatzea aurreikusten da, “"Legebiltzarrak gure demokrazia instituzionaletan duen zentraltasunari eta beharrari" buruzkoa. Horrez gain, osasun egoeraren arabera zoom bidez edo aurrez aurre eginen diren lauzpabost hitzaldi eskainiko dira, interes orokorreko gai juridiko-konstituzionalei eta parlamentuzkoei buruzkoak.

Era berean, ikasleek Nafarroako Parlamentura egin ohi dituzten bisitak mantendu eginen dira, nahiz eta era birtualean egiteko aukera ere planteatzen den, eta Unibertsitateko ikasleen eta parlamentarien arteko topaketei dagokienez, azken urteotako formatua mantentzearen aldeko apustua egin da (nahiz eta birtualki egitea ere proposatu den), hau da, ikasleen eta parlamentarien arteko zuzeneko topaketa, forudunen eta haien lanaren ikuspegi osoagoa ahalbidetzeko. Nolanahi ere, helburua da funtzio politikoarekin eta parlamentariaren zerbitzari publikoaren eginkizunarekin zerikusia duten gaien inguruan ideiak trukatzea.

Komunikazio fakultateari dagokionez, teknologiak gazteengan duen eraginari eta bereziki pandemia egoeran izan duen eraginari buruzko hitzaldi bat burutzea aurreikusten da. Eta The George Washington Universityrekin lankidetzan ezarritako Komunikazio Politiko eta Korporatiboko Masterraren barruan, bisita bat antolatu da Legebiltzarraren eta haren komunikazio-zerbitzuaren antolaketa eta funtzionamendua ezagutzeko.

Hitzarmena sinatu ondoren (gehienezko aurrekontua 16.210 eurokoa da), Unai Hualdek eta Alfonso Sánchez-Tabernerok beren “poza” adierazi dute; “edukiak eguneratuz probetxuzko harremanari jarraipena ematen” zaiolako, eta “urte askoan” iraungo duela espero baita.