Zorra jaulkitzea eta Nafarroak 16.000 milioi euroko funtsaren banaketan parte hartzea premiazkoa dela esan du Uxue Barkosek

Uxue Barkos Geroa Baiko bozeramaileak ziurtatu duenez “premiazkoa” da Espainiako Gobernuak Nafarroak zorra jaulkitzea baimendu dezan, eta Komunitate Autonomoek Covid-19aren krisialdiari aurre egiteko Kongresuak onartutako 16.000 milioi euroko funtsaren banaketan Foru Komunitateak parte hartzea Hitzarmen Ekonomikoaren baitan negozia dadin.

Uxue Barkosek prentsaurrekoan ziurtatu duenez, Nafarroak neurri finantzarioak hartu behar ditu “bultzatzen ari gaituzten inertzia jakinen aurretik”. “Nafarroan ezin gara beste aldera begira egon, gure finantzen konponbidea Estatuak Europako funtsen alde egiten ari duen apustuan dagoela ustez”, adierazi du.

Horregatik, Geroa Baik adierazpen instituzional bat erregistratu du Nafarroako Parlamentuan Gobernu zentralari eskatuz hilabete honetan bertan Nafarroaren zorra jaulkitzea baimendu dezan eta Nafarroak 16.000 milioiko funts osoaren banaketan parte hartzeko, eta ez funtsaren zati batenean bakarrik, Hitzarmen Ekonomikoaren markoaren baitan negozia dezan”, azpimarratu du.

Uxue Barkosek zehaztu duenez, ez du PSNrekiko inolako “mesfidantzarik” eta bere “babes leiala” eskaini dio Chivite presidenteari zeregin honetan, nahiz eta ohartarazi ere “inertzia aholkulari ezin okerragoa izango dela krisialdi honen irtenbidean”.

Bestalde, Geroa Baiko bozeramailea oso kritiko agertu da Espainiako Gobernuarekin “udalen diru-kutxa soberakina kreditu biguin moduan bereganatzeko” egin duen iragarpena dela eta, “horren zati bat 2021an itzuliko baita eta gainontzekoa datozen hamar urteetan zehar”. “Toki erakundeek duten diru-kutxa soberakina urteetan zehar izandako jardun onak azaltzen du, udalen jabetzakoa den soberakina da eta udaletako beharrizanei erantzuna emateko bideratu behar da”, defendatu du.

Horrela, Geroa Baik mozio bat aurkeztuko du ordezkaritza duen udaletan, Espainiako Gobernuari eskatuz toki erakundeek haien diru-kutxa soberakina erabiltzea baimen dezan.

Pablo Azcona Geroa Baiko parlamentariak azpimarratu duenez “paradoxikoa da azken urteetan zehar udalek kudeaketa on bati esker sortzen zituzten superabitak erabiltzea Estatuak debekatu izana”, eta orain Administraritza zentralak “diru hori eskatzea”. “Urte askotan zehar udalen soberakina Estatuaren kontuak Bruselaren aurrean zuritzeko eta makillatzeko erabili dira. Behin udalak horretarako erabili ondoren, gure iritziz orain planteamendu hori egitea ez da onargarria”, nabarmendu du.

Horregatik, Azconak aurrekontuen egonkortasunerako legea indargabetzea eskatu du bai eta udalek haien soberakina erabiltzeko askatasuna edukitzea ere, “krisialdi honetatik irteteko politikak jardun ahal izateko”.

Ekimen hauekin batera, Europarekin itundu daitekeen suspertze ekonomikorako plana “politika sozial berdeari” lotuta egon dadin defendatuko du Koldo Martínez Geroa Baiko senatariak, eta gainera, Europatik datozen laguntzak “Komunitate Autonomo eta udalekin modu aktiboan elkarbana daitezen”.

Foru Berriaren gainean akordiorako deialdia

Azkenik, prentsaurrekoan zehar, Uxue Barkos Geroa Baiko bozeramaileak gogorarazi duenez, ia urtebeteren ondoren, Espainiako Gobernuak Nafarroako Foru Berriaren eguneratzearen aurkako bere helegitea mantentzen du, horren aurrean helegite hori kentzea ahalbidetuko duen “akordio” bat eskatuz.

Horrela, Pedro Sánchezen Gobernuari deialdia egin dio “edozein negoziazio bizkortu dadin, elkarrizketei berriro hel diezaieten eta lehenbailehen akordio batera iritsi daitezen”, egoera honek “ziurgabetasun juridikoa” sortzen ari duela ohartaraziz.

Iturria: EUROPA PRESS