Mekarako AVE-an RENFEren emaitzei buruz informatzeko Gobernuaren ezezkoaren aurrean Senatuko mahaiburuaren babesa eskatu du Koldo Martínez senatariak

Koldo Martínez Nafarroako senatari autonomikoak (Geroa Bai) Goi Ganberako mahaiburuaren babesa eskatu du, RENFEk Mekarako AVEan duen partaidetzaren mozkin ekonomikoei buruzko informazioa Gobernuak ukatu ondoren. Trenbide operadore publikoak ia 150 milioi galdu omen zituen Saudi Arabian 2012 eta 2018 bitartean, Ogasun Ministerioaren baitan dagoen Estatuko Administraritzaren Interbentzio Orokorraren (IGAE gazteleraz) ohar baten arabera.

“Tamalgarria da RENFE bezalako enpresa publiko batek atzerriko negozio batean dirua barra-barra galtzen duen bitartean, Espainiako trenbide sistemak dituen gabetasunekin, milioika euroko komisioak jasoz aberastu direnak egon izana, komisio horien artean asko errege emerituari egotziak”, gogorarazi du Koldo Martínezek.

Baina, Nafarroako senatari autonomikoaren aburuz, “are eta okerragoa da oraindik gobernu demokratiko batek kudeaketa publikoaren kontrola jarduteko eginbeharra duen ganbera bati, kontratu honek enpresa erakunde publiko batengan izandako eraginei buruzko informazioa ukatzea, enpresa hori espainiar guztien ondarea baita, eta jakina izanik Juan Carlos Borboikoa kontratu horretan bitartekari izan zela”.

Koldo Martínezek Gobernuari zuzenduriko idatzizko galdera bat aurkeztu zuen abuztuaren 11an, RENFEk 2013 urtetik gaurko egunera arte makroobra horretan lortutako emaitza ekonomikoa ezagutzeko helburuarekin. Medina eta Mekaren arteko trenbidea egiteko lehiaketa irabazi zuen partzuergoan hiru enpresa publikok, hots RENFE, ADIF eta INECO, kapitalaren %49,87 jarri zutela gogoratu beharra dago. “Espainiako iritzi publikoak orain susmopean dagoen operazio horren gastuak ez ezik, mozkinak ere nola banatu ziren jakiteko eskubidea duela uste dut, eskuartean ditugun iturrien arabera, enpresa pribatuak mozkinekin geratu baitziren, bien bitartean enpresa publikoek galerak bere gain hartu zituztelarik”.

“Senatuko mahaiburuari babesa eskatzera beharturik nago, Gobernuak kontratu honen atzean benetan dagoena ezagutzeko funtsezko informazioa Goi Ganberari ezkutatzen saiatzen ari dela iruditzen baitzait. Gobernuak eman ez duen erantzunean, Estatuko Administraritzaren Interbentzio Orokorrera igortzen du ardura, hain iluna den gai honetan RENFEk galdutakoaren datuak zuzenean ez emateko. Eta kontratuari buruzko nire informazio eskakizunari erantzun moduan, partzuergo pribatu bati dagokiola esatera mugatzen da, hortaz, ondorioztatu dezakegu, Gobernuaren aburuz enpresa publiko batek kide pribatuekin egiten duen ekintza oro parlamentuaren kontrolpetik kanpo egon behar duela, nire iritziz zeharo ohiz kanpokoa dena”, nabarmendu du Geroa Baiko senatariak.