Oposizioak ohartarazi du Mayari erantzunkizunak eskatuko dizkiola, baita ekonomikoak ere, Labriteko pasabidean adostu gabeko konponketa dela eta

Geroa Baik, EH Bilduk eta PSN-PSOEk sinatutako adierazpen batek gobernu-taldeari eta, zehazki, Enrique Maya alkateari ohartarazten die Labriteko pasabidea indartzeko eta saneatzeko obrak esleitzeko espedientearekin alde bakarrez jarraitzeko asmoa dutela, horretarako baliabide ekonomiko nahikorik ez lortzearen edota ustezko kalte-ordainen bat jasotzearen aukeraren aurrean, erantzukizuna, soil-soilik, alkate eta proiektu estrategikoen zinegotzi delegatuarena izango dela. Akordio-puntu hori Hirigintza Batzordean bihar eztabaidatzeko aurkeztu den testu bateratuan jasotzen da, Maya buru duen Udaleko Gobernu Batzordeak 600.000 eurotik beherako zenbatekoa duten konponketa-lanak Udalaren babes nahikorik gabe esleitu eta bi egunera, eta inbertsioaren guztizkoa 840.000 eurotik gorakoa izan zen, jatorrizko egiturak (proiektua barne) 680.00 euroko kostua izan zuenean.

Proiektu Estrategikoek emandako datuen arabera, Iruñeak aurreratu egingo du pasabidea konpontzeko kostua, baina gobernu-taldeak ez du gehiengo nahikorik izango. Zehazki, 720.000 euro inguru kalkulatu dira, eta honako hauei dagozkie: egitura indartzeko obrak esleitu diren 593.000 euroei; proiektua idazteko 32.000 euroei; segurtasun-neurriak idazteko 33.000 euroei, Ingeniarien Elkargoari aldez aurretik eskatutako lanen 62.000 euroei, horien kontratua modu irregularrean esleitu baitzen TANren arabera. Hala ere, kopuru horiei gehitu behar zaizkie, gainera, materialen kostua eta segurtasun-neurriak instalatzeko lana, bai eta erantzukizuna garbitzeko espedientea izapidetzean (2017-2019) egindako lanen kostua ere. Guztira 120.000 euro gehiago, beraz, Udalak aurreratuko duen inbertsioa 840.000 eurokoa izango da.

Errealitate horren aurrean, Osoko Bilkuraren gehiengoa osatzen duten hiru taldeek udal gehiengoak Labriteko Pasabidearen etorkizunari buruz hartutako erabakia errespetatzeko eskatu diote Iruñeko Udaleko gobernu-taldeari, konponketak dakarren kostu handia ikusita. Puntu horretan ohartarazten dute, alde bakarreko planekin jarraituz gero, Mayari eta Fermin Alonsori pertsonalki eskatuko dizkietela gerta litezkeen erantzukizunak.